سلیم کوثر

 تازہ غزل۔۔۔ سلیم کوثر ۔۔۔۔۔۔۔۔۔۔۔۔۔۔۔ سرِ عدالتِ دنیا بدل گیا سب کچھ نظامِ عدل کی مکّاریاں نہیں بدلِیں کسی کا خواب خزانہ بکھر نہ جائے سلیم ...

 تازہ غزل۔۔۔

سلیم کوثر

۔۔۔۔۔۔۔۔۔۔۔۔۔۔۔

سرِ عدالتِ دنیا بدل گیا سب کچھ

نظامِ عدل کی مکّاریاں نہیں بدلِیں

کسی کا خواب خزانہ بکھر نہ جائے سلیم

اسی خیال سے الماریاں نہیں بدلِیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بدل گئ ہیں رُتیں یاریاں نہیں بدلِیں

محبتوں میں رواداریاں نہیں بدلِیں

اکیلے رہ گئے ہم رزم گاہِ ہستی میں

مگر ہماری وفاداریاں نہیں بدلِیں

سرِ عدالتِ دنیا بدل گیا سب کچھ

نظامِ عدل کی مکّاریاں نہیں بدلیں

سَروں سے وقت نے رفتاریں کھینچ لیں پھر بھی

قبیلے والوں کی سرداریاں نہیں بدلیں

ہماری راہ کا نقشہ بدلنے والوں نے

ہماری راہ کی دُشواریاں نہیں بدلِیں

تمہاری ہجر گذاری کی دُھوپ چھاؤں میں

خمارِ چشم سے بیداریاں نہیں بدلِیں

الجھتے سائے ہیں ، سرگوشیاں ہیں،سازشیں ہیں

محل بدل گئے، راہداریاں نہیں بدلِیں

وہی گرہ کُشا سوچیں وہی جہاں نما فکر

ترے خیال کی تہہ داریاں نہیں بدلِیں

کسی کا خواب خزانہ بکھر نہ جائے سلیم

اسی لئے کبھی الماریاں نہیں بدلِیں۔