احمد ندیم قاسمی کا ایک خوبصورت شاہکار آپ سب کی نذر ❤️ "زندگی کے لیے ایک نظم" زندگی! میں کہاں تک تِرے اِک چراغِ گُریزاں کا پیچھا ...
احمد ندیم قاسمی کا ایک خوبصورت شاہکار آپ سب کی نذر ❤️
"زندگی کے لیے ایک نظم"
زندگی!
میں کہاں تک تِرے اِک چراغِ گُریزاں کا پیچھا کرُوں!
زندگی!
میرے تَلووں میں اِتنے پَھپھولے ھیں
جتنے تِرے گُزرے لمحات ھیں!
زندگی!
میرے اندر جو تنہائیوں کے خَلا ھیں
وہ تیری عَطا ھیں!
میں زندہ رھا تو تِرے نام کی لاج رکھنے کو زندہ رھا
ورنہ مرنا تو ـــــــــــــ
اے زندگی!
ــــــــــــــ اِتنا آسان ھے
جتنا دُشوار ھے زندہ رھنا!
زندگی!
اب میں تھک سا گیا ھُوں
مجھے حُسنِ اِنساں بھی
اور حُسنِ فِطرت بھی
اور حُسنِ تخیّل بھی
کچھ اَدھوُرے سے لگتے ھیں
جُھومر میں جیسے فقط ایک نَگ کی کمی
پُورے جُھومر کی تکمیل پر حرف لاتی ھے
ھر چیز پَژمردہ ھے
اب نیا پُھول بھی اپنی خوُشبو کو زنجیر کہتا ھے
اور ایسی زنجیر میں قید رھنے سے اَفسُردہ ھے!
آج میں رات بھر صُبح کی راہ تکتا رھا
اور جب صُبح آئی
تو جیسے وہ مریم ھے
جو رات بھر
اپنی پاکیزگی کے حَصاروں میں روتی رھی ھے!
میں اب ڈر کے مارے نگاھیں جُھکا کر ھی چلتا ھُوں
اب سامنے دیکھنا اِک بڑا کَرب ھے
سامنے ایک مَلبہ ھے ــــــــــــــ!
ٹوُٹے ھُوئے دَر ھیں
یعنی مِرے خواب ھیں
اور کُچلے ھُوئے سَر ھیں
جو تیرے برتاؤ ھیں
اور اِن سب پہ بکھری ھُوئی
آسمانوں کے بِلّور کی کِرچیاں ھیں!
زندگی!
توُ بہت خوُبصورت سہی
تُجھ سے میری مُحبّت بھی کم خوُبصورت نہ تھی!
میں نے ھر جسم میں
اور ھر عَکس میں
اور ھر سائے میں
تیرے پَرتو اُجاگر کیے
میں نے انسان کو تُجھ سے اِک والہانہ مُحبّت کی تلقین کی
مَرنے والوں کے حق میں دُعا کی تو یہ کی
کہ وہ دُوسری زندگی ــــــــــــــــ دائمی زندگی میں
سلیقے سے زندہ رھیں
موت کے خوف کے ختم ھونے پہ بھی
حُسن و خیر اُن کا کردار ھو
اُن کا اپنا ضمیر اُن کا معیار ھو!
زندگی!
اب توُ میرے قریب آ
مُجھے لَمس کی حِدّتیں بَخش
میرے لہُو میں اُتر
اور میری تھکن کو سمیٹ اِس طرح
جیسے جاتا ھُوا آفتابِ جہاں تاب
اپنی شعاعیں سمیٹے!!
کوئی تبصرے نہیں